காவல் உதவி ஆய்வாளர் மகன்களுக்குள் மோதல்;தப்பியோடிய 3 பேர் கைது

பெரம்பலூர் காவல் நிலையத்தில் சிறப்பு உதவி ஆய்வாளராக பணியாற்றியவர் பாண்டியன். இவருக்கு, ஜெயா, மேரி, விஜயலட்சுமி என மூன்று மனைவிகள் உள்ளனர்.ஜெயாவுக்கு செல்லப்பாண்டி(வயது 22) என்ற மகன் உள்ளனர். மேரிக்கு ஜேம்ஸ் பாண்டியன் (வயது 24), பிரவீன் குமார் (22) என இரண்டு மகன்கள் உள்ளனர். விஜயலட்சுமிக்கு பினகோஸ், ஜோஸ்வா, எஸ்லியா என மூன்று பிள்ளைகள். பாண்டியனுக்கு மொத்தம் 6 குழந்தைகள் உள்ளனர். அரசு ஆசிரியர் கொலை வழக்கில் சரியான நடவடிக்கை எடுக்காத காரணத்தால் பாண்டியன் பணியிடை நீக்கம் செய்யப்பட்டுள்ளார்.இந்நிலையில் கடந்த 6-ம் தேதி பாண்டியனின் தந்தை செல்லமுத்து உடல்நலக்குறைவு காரணமாக காலமானார். அப்போது பாண்டியனின் மூன்றாவது மனைவி விஜயலட்சுமி மற்றும் குழந்தைகள் வந்துள்ளனர். இவர்கள் ஏன் இங்கு வரவேண்டும் என முதல் இருதாரத்துக்கு பிள்ளைகள் சண்டைப் போட்டுள்ளனர். இதன்காரணமாக இவர்களுக்கு இடையே பிரச்சனை ஏற்பட்டுள்ளது.இந்நிலையில் நேற்று இரவு விளாமுத்தூர் சாலையில் வைத்து ஜேம்ஸ் பாண்டியன், பிரவீன் குமார், செல்லப்பாண்டி ஆகிய மூவரும் சேர்ந்து பினேகாஸ் மற்றும் அவரது சகோதரர் ஜோஸ்வா ஆகியோரை கடுமையாக தாக்கியுள்ளனர். அப்போது பினேகாஸ் என்பவரின் கை மணிக்கட்டை வெட்டிவிட்டு சம்பவ இடத்தில் இருந்து தப்பித்து விட்டனர். இதனையடுத்து காயமடைந்தவர்களை அருகில் இருந்தவர்கள் மீட்டு சிகிச்சைக்காக பெரம்பலூர் அரசு மருத்துவமனைக்கு கொண்டு சென்றனர். அங்கு அவர்களுக்கு முதலுதவி சிகிச்சை அளிக்கப்பட்டது.பின்னர் மேல் சிகிச்சைக்காக திருச்சியில் உள்ள தனியார் மருத்துவமனைக்கு அனுப்பி வைத்தனர். இந்த சம்பவம் தொடர்பாக போலீசார் வழக்குப்பதிவு செய்து விசாரணை மேற்கொண்டனர். இந்த சம்பவத்தில் தப்பியோடிய மூன்று பேரையும் நள்ளிரவில் போலீசார் கைது செய்தனர். அவர்களை பெரம்பலூர் காவல்நிலையத்தில் வைத்து விசாரணை மேற்கொண்டு வருகின்றனர்.